أبو رحاب - by Salem EL Dousoky

أبو رحاب
ابو رحاب شخصيه موجودة بيننا من الممكن ان يكون اخى او اخوك اوإبن عمى أوإبن عمك إلخ.
هو من مصر ومن الشام ومن شمال
افريقيا ومن أى مكان فى عالمنا العربى وبالبلدى كده هو موجود بيننا وواحد مننا ونوادره كما نوادر عن عمنا المرحوم جحا.
و بحكم مصريتى وفرعونيتى لا أجيد أى من اللهجات الاخرى فاسمحوا لى يا ساده ياكرام ان اكتب لكم بالمصريه. وإن شاء الله سيكون لنا بين الحين وألآخر لقاء مع العم أبو رحاب(هذا إذا أرتم))
ولو سمحتم يا ساده ياكرام الزعل مرفوع وإللى يزعل يروح يشرب اجدع مشروب على حساب العبد لله بس على شرط.
أن يكون فى حدود25 سنت أمريكانى لأن أخوكم على باب الكريم وبيقبل التبرعات
,ومافيش داعي للمحاكم والمحاميين(ربنا يكفينا شرهم) وخلافه لأنى غلبان أوى أوى أوى
المهم تعالوا كده لما نشوف نادرة من نوادر أبو رحاب
حصل المذكور أعلاه على تأشيرة دخول إلى بلاد العم سام (إزاى ؟ معرفش) عقبال الحبايب وقد تزوج من واحده شقراء وهى بالنسبه له زى ماتقول كده على رأى المرحوم العندليب فى اغنيه سمراء ياحلم الطفوله
صاحبنا بقا عملها شقراء ياحلم الطفوله
وفى يوم من الأيام ياساده يا كرام كان عمنا أبو رحاب قاعد مع شله ألأؤنس والعمليه آخر تمام ياجدع وهاتك يا حكى عن مغامراته ايام الصبا فى مصر المحروسه وطبعا 90%من الكلام بالانجليزى بس على طريقه خالتى
ام انصاف لما تتكلم صينى

وفجأه رن جرس التليفون وكان على الطرف ألآخر المدام بتاعه عمنا أبو رحاب(أم رحاب) وطبعا أخذت تستسفر منه عن سبب تأخيره عن عودته للدار العامره
ولم يجد عمنا الذكور أعلاه أى سبب للتأخير إلا عطل بالسياره
وقال لها بلهجه زى لهجه خالتى ام انصاف)
هني ذا بطاريه سلييب
Honey the btariya sleep
( الترجمه الحرفيه لجمله البطاريه نايمه بلُغه أهل الهرم والنيل)
وهو طبعا كان عاوز يقول لها بألأمريكانى
The battery is weak
وطبعا الست ام رحاب على الطرف الثانى طاير عقلها ومش عارفه يعنى ايه البطاريه نايمه ؟
وإلى القاء مع نادرة أخرى من نوادر عمنا أبو رحاب.

أبن الهرم والنيل